عبدالستار ميمڻ: نامور تعليمدان حافظ عبدالستار ولد عبدالقادر ميمڻ، پهرين آگسٽ 1914ع تي شڪارپور شهر ۾ پيدا ٿيو. هن ابتدائي تعليم شڪارپور مان حاصل ڪئي. سندس گهراڻو مذهبي هو. ننڍپڻ ۾ قرآن شريف مڪمل حفظ ڪيائين ۽ مئٽرڪ شڪارپور جي هاءِ اسڪول مان، انٽر سي اينڊ ايس ڪاليج شڪارپور مان، عربي ۽ فارسيءَ جي تعليم وڪٽوريا جوبلي اسڪول شڪارپور مان، بي. اي بمبئي يونيورسٽيءَ مان امتيازي حيثيت ۾ ڪيائين. عبدالستار ميمڻ پنهنجي عملي زندگيءَ جي شروعات ٽيلي گراف کاتي ۾ ٽيليفون آپريٽر طور ڪئي. بعد ۾ پڙهائيءَ سبب نوڪري ڇڏيائين. تعليم مڪمل ڪرڻ بعد گورنمينٽ پرائمري اسڪول نوشهرو فيروز ۾ استاد مقرر ٿيو. بعد ۾ کيس اين. جي. وي هاءِ اسڪول ڪراچي بدلي ڪيو ويو. جتي نوڪريءَ دوران بي. ٽي جو امتحان پاس ڪيائين. 1955ع ۾ گورنمينٽ هاءِ اسڪول سکر جو هيڊماستر، 1957ع ۾ گورنمينٽ هاءِ اسڪول ميرپورخاص جو هيڊماستر، 1985ع ۾ شڪاپور هاءِ اسڪول جو هيڊماستر مقرر ٿيو. عبدالستار 1961ع ۾ نوابشاهه جو ڊسٽرڪٽ انسپيڪٽر آف اسڪولس، ڊسٽرڪٽ انسپيڪٽر آف اسڪولس ٺٽو، 1964ع ۾ سانگهڙ ۾ DIS، 1966ع ۾ نوابشاهه ضلعي جو ڊسٽرڪٽ انسپيڪٽر آف اسڪولس، 1967ع ۾ ڪراچيءَ ۾ ڊپٽي ڊائريڪٽر ايجوڪيشن، ڊائريڪٽر ايجوڪيشن ڪراچي، انسپيڪٽر ٽريننگ ڪاليجز سنڌ ۽ پرنسپال ٽريننگ ڪاليج فار مين حيدرآباد طور پنهنجون خدمتون سرانجام ڏنائين. ان دوران ٽريننگ ڪاليج حيدرآباد مان شايع ٿيندڙ رسالو ‘اخبار تعليم’ ٻيهر جاري ڪرايائين. 1971ع ۾ انسپيڪٽر آف اسڪولس حيدرآباد ريجن مقرر ٿيو. جنهن دوران تعليمي سڌارن لاءِ ڪيتريون ئي ڪوششون ورتائين. هيءُ1 آگسٽ 1972ع تي رٽائر ٿيو. جنهن بعد سنڌ ٽيڪسٽ بوڪ بورڊ ۾ مقرر ٿيو، جنهن دوران هن ڪيترائي سبق لکيا ۽ ڪتاب ايڊٽ ڪيا. 1976ع ۾ پبلڪ اسڪول سکر جو پرنسپال مقرر ٿيو. ضياءَ الحق جي حڪومتي دور ۾ کيس تعليمي اوارڊ ڏنو ويو. هن 23 فبروري 1994ع تي وفات ڪئي.
1914.08.01 عيسوي
عبدالستار ولد عبدالقادر ميمڻ، پهرين آگسٽ 1914ع تي شڪارپور شهر ۾ پيدا ٿيو.
1994.02.23 عيسوي
عبدالستار ميمڻ 23 فبروري 1994ع تي وفات ڪئي.